Голем број на ентузијастични франкофони од Македонија се пријавија за учество на Универзитетот на мирот 2014. Токму од тие причини процесот на селекција беше мошне тежок за Канцеларијата на соработката Долна Нормандија/Македонија и Меѓународниот Институт за Човекови права и мир од Каен. Поради големиот интерес за Универзитетот на мирот 2014, оваа година Институтот за Човекови права и мир од Каен реши да поддржи седум учесници од Македонија. Нивните профили се разноврсни, но неколку нешта им се заеднички: страста кон темата „Да се бориме за слобода“, разговорите и дебатите кои таа ќе ги поттикне, како и љубовта кон Франција и францускиот јазик. Овие седум учесници беа избрани токму поради нивната мотивација и посветеност.
Еве прилика да се запознаете малку подобро со сите македонски претставници на Универзитетот на мирот 2014, кој ќе се одржи од 6 до 13 јули 2014 година.

Адријана Ананиева

Адријана е родена во Скопје, Македонија. Има завршено студии по италијански јазик и книжевност и американски студии на Филолошкиот факултет „Блаже Конески“. Адријана исто така посетувала и часови по Родови студии на Институтот „Евро-Балкан“ а, моментално е запишана на Правниот факултет „Јустинијан Први“.
Со пишување се бави од мали нозе и има освоено на разни конкурски. Адријана работела за неколку весници и сè уште пишува, често и на англиски јазик. Во слободно време ја усовршува техниката – везење на хартија, на која работи веќе неколку години. Во тек се припремите за нејзината втора изложба.

Ардиан Рамадани

Ардиан е професор по француски јазик. Дипломирал на катедрата за француски јазик и книжевност и има магистратура по дипломатија и политички науки насловена „Дипломатијата на кардиналот Ришелје и доктрината на Национален интерес“. Тој е писател и автор на 4 книги.
 
Ардиан е исто така политички аналитичар, судски преведувач по албански, македонски и француски јазик и тренер на боречки вештини.

Маја Тишовска

Маја има 23 години и верува дека младите треба да го спасат светот, затоа таа е многу среќна што ја има можноста да сподели една недела со учесниците на Универзитетот на мирот каде ќе можат да разменат мислења на разни теми.

Таа е голем љубител на странски јазици, сака да патува и да открива нови култури.  По професија е дипломиран преведувач и толкувач и ужива во својата работа на која што ѝ го посветува поголемиот дел од времето. Нејзините пријатели се нејзиното вистинско богатство, со нив и со нејзиното семејство ги поминува најубавите мигови. Во слободно време вози велосипед и обожува театар.

Мајда Тодоровска

Мајда има 24 години, но откако почнала да размислува на тема – слобода, таа мисли дека и малку остарела. Нештата кои ѝ се најдраги се пеењето, танцувањето, активизмот. Исто така се интересира и за општествени науки. Мајда длабоко верува во мирот и дека се може да се оствари со добро размислување и добра намера.

Предраг Ивановски

Предраг има 25 години и моментално ја пишува својата магистерска теза по Деловно право. Веќе една и пол година работи како стажант во адвокатска канцеларија во Скопје. Од 2007 до 2009 година Предраг бил студент на Правниот факултет „Луј Пастер“, Универзитет во Руен (Франција) и негува многу убави спомени од тоа искуство. Својот матурски испит го поминал на француски јазик во Македонија бидејќи учел во билингвална паралелка во средно училиште.

Последните неколку години, учествува на неколку различни обуки како волонтер, студент и стажант. Според него Универзитетот на мирот е многу добра прилика за да се остварат пријателства, соработка и да се научат многу нешта.

Даниела Колеска

Даниела е толкувач, преведувач и професор како и голем љубител на странските јазици, патувањето, Франција и слободата. Таа магистрирала „Превод и локација“ на Универзитетот на Рен (Франција). Нејзиното професионално искуство ѝ овозможува да осознае разни полиња на интерес, како што се човечките права, но и разни земји, меѓу кои и Регионот Долна Нормандија. Токму поради овие причини има желба да учествува на Универзитетот на мирот.