На 22 октомври 2015 година, започна традиционалната манифестација „Денови на Француската култура во Дебар“ како дел од проектот „Вкрстено наследство“ во рамките на Соработката Долна Нормандија – Македонија.
Манифестацијата започна со трибина на тема „Улогата на медиумите во општеството со посебен осврт на ситуацијата со медиумите во Македонија и на локално ниво“, која ја отворија градоначалникот на Дебар, Ружди Љата, Рафаел Галвез од Франција и Сања Трпковска од АЛДА Скопје, координатор на соработката Долна Нормандија – Македонија. На трибината свое обраќање имаа и Дона Костуранова, извршна директорка на Младинскиот образовен форум и Фатлуме Дервиши, новинарка од интернет портал за информирање.
По дебатата, во просториите на новиот амам, беше отворена изложбата „Градот Иф во Втората светска војна“, на која низ фотографии и видео инсталации присутните можеа да се запознаат со историјата на оваа француска општина.
Општината Иф и општината Дебар се збратимени од 2009 година и заедно соработуваат на голем број проекти, најмногу во областа на културата и младите.